Gwasanaethau Caffael yn dathlu llwyddiant yng ngwobrau cenedlaethol Health Care Supply Association
Llongyfarchiadau i'n hisadran Gwasanaethau Caffael sydd wedi bod yn llwyddiannus mewn nifer o gategorïau yng ngwobrau cenedlaethol mawreddog Health Care Supply Association (HCSA). Anrhydeddwyd Gwasanaethau Caffael i gydnabod y gwaith rhagorol y maent wedi bod yn ei wneud a sut mae staff wedi parhau i ddangos eu hymroddiad, eu harloesed a'u proffesiynoldeb wrth gefnogi gwasanaethau gofal iechyd i gleifion yn barhaus.
Yn y gwobrau rhithwir, a gynhaliwyd ar 18 Tachwedd 2020, dyfarnwyd tîm Caffael Rheng Flaen PCGC Caerdydd a'r Fro yn gyd-enillwyr yng nghategori Tîm Caffael y Flwyddyn; cafodd Claire Salisbury o Gaffael Rheng Flaen Caerdydd a'r Fro PCGC ganmoliaeth uchel yn y categori Arweinydd Caffael y Flwyddyn; cafodd Gwasanaethau Caffael ganmoliaeth uchel yn y wobr Cydweithio Traws-Swyddogaethol mewn cydweithrediad â'r Uned Gomisiynu Cydweithredol Genedlaethol (Cytundeb Fframwaith Cydweithredol Cenedlaethol ar gyfer Oedolion â phroblemau Iechyd Meddwl ac Anableddau Dysgu), a chanmoliaeth uchel yn y categori gwobr Technoleg Caffael ar gyfer Caffael Rheng Flaen Caerdydd a’r Fro PCGC (Rhaglen Ddigideiddio Gofal Llygaid Cymru Gyfan).
Roedd ein cydweithiwr caffael Paul Sydenham hefyd yn enillydd Gwobr Cyflawniad Oes y Cadeirydd. Barnwyd mai Paul, a ymddeolodd yn ddiweddar ar ôl dros bedwar degawd a hanner o wasanaeth ymroddedig i gaffael, oedd yr enillydd gan fod ei arbenigedd, ei wybodaeth a'i frwdfrydedd wedi chwarae rhan hanfodol wrth ddarparu gwasanaethau i'r GIG yng Nghymru. Mae Paul hefyd wedi chwarae rhan enfawr yn yr HCSA fel cynrychiolydd rhanbarthol Cymru ers dros 20 mlynedd.
I ddod â seremoni wobrwyo lwyddiannus iawn i ben, barnwyd bod holl gymuned gaffael a chyflenwyr y GIG yn enillwyr Gwobr Llywydd HCSA.
Wrth ystyried llwyddiannau Gwasanaethau Caffael yn y gwobrau, dywedodd Jonathan Irvine, Cyfarwyddwr Gwasanaethau Caffael: “Rwy’n falch iawn bod gwaith Gwasanaethau Caffael PCGC wedi cael ei gydnabod mor eang trwy ein llwyddiant yng ngwobrau cenedlaethol HCSA. Mae ehangder y llwyddiant hwn ar draws nifer o gategorïau yn dangos ein cyflawniadau mewn sawl maes o weithgarwch caffael ac yn tynnu sylw at y dalent eithriadol yr ydym yn ei datblygu yn ein proffiliau tîm ac arweinyddiaeth. Mae'r cyflawniadau hyn yn arbennig o arwyddocaol eleni o ystyried yr heriau caffael ychwanegol a ddaeth yn sgil COVID-19, yr oedd yn rhaid i staff eu cyflawni. Hoffwn ddiolch i'r holl staff a gymerodd ran a rhoi fy llongyfarchiadau diffuant i enillwyr ein gwobrau."
Ychwanegodd Graham Davies, Dirprwy Gyfarwyddwr Gwasanaethau Caffael, “Unwaith eto, mae NWSSP wedi profi ei bod yn sefydliad sy'n arddangos rhagoriaeth ac sy’n darparu gwasanaethau o safon. Rydym wedi ennill gwobrau mewn 6 o'r 10 categori, felly gall pawb sy'n gweithio yng Ngwasanaethau Caffael ac yn y Gwasanaeth Negesydd Iechyd fod yn falch o'u cyflawniadau. Roedd yn arbennig o braf nodi bod Llywydd HCSA - yr Arglwydd Philip Hunt - yn cydnabod ymdrechion holl gymuned caffael, logisteg a chyflenwyr y GIG am ein hymdrechion yn ystod y pandemig COVID."
Dywedodd Mark Roscrow MBE, Cyfarwyddwr Rhaglen - Gwasanaethau Caffael a Chadeirydd Ymddiriedolwyr HCSA: “Fel Cadeirydd yr Ymddiriedolwyr, rwy’n siŵr y gallwch chi ddeall ei bod yn anodd iawn trefnu'r gynhadledd ar-lein a rhedeg y broses ddyfarnu arferol. Yn gyntaf, rwy’n gwerthfawrogi cyfraniad pawb a helpodd i'w wneud yn ddigwyddiad mor wych. Hoffwn estyn fy llongyfarchiadau i bawb a lwyddodd naill ai i ennill neu i ennill statws canmoliaeth uchel. Rwy'n gwybod ei bod yn anodd iawn bod yn feirniad gan fod cymaint o gynigion da iawn. Roeddwn hefyd wrth fy modd gyda gwobr y Llywydd a dylai'r holl staff deimlo'n falch iawn am dderbyn y gydnabyddiaeth hon am gyflawni gwaith gwych. Roedd hefyd yn bleser imi gyflwyno gwobr y Cadeirydd i Paul Sydenham i gydnabod popeth y mae wedi’i wneud i HCSA dros nifer o flynyddoedd.”
“Byddai wedi bod yn braf rhannu’r gydnabyddiaeth hon mewn cinio gwobrwyo, ond yn amlwg, nid oedd hynny'n bosibl, felly gobeithio bod y timau a'r unigolion wedi cael rhyw fath o gydnabyddiaeth. Gobeithio y byddwn yn gallu dod at ein gilydd y flwyddyn nesaf ac y bydd Cymru unwaith eto yn gosod y safon nid yn unig yn nifer y cyflwyniadau, ond hefyd yn nifer y cyflwyniadau llwyddiannus.”
Wrth ennill Gwobr Tîm y Flwyddyn, dywedodd Claire Salisbury, Cyfarwyddwr Cynorthwyol Caffael (Bwrdd Iechyd Prifysgol Caerdydd a'r Fro), Gwasanaethau Caffael: “Rwy’n falch iawn bod tîm lleol Prifysgol Caerdydd a’r Fro wedi cael ei gydnabod yn y Gwobrau Cenedlaethol. Mae'r tîm yn dangos eu gallu yn gyson i fynd y tu hwnt i'r disgwyliadau a osodwyd ar eu cyfer, trwy wneud gwaith tîm a chydweithio. Roedd hyn yn arbennig o amlwg yn ystod yr ymateb i Covid-19 pan ragorodd y tîm wrth gefnogi Bwrdd Iechyd y Brifysgol a Chymru Gyfan i gyflawni eu hamcanion strategol"
Wrth gael canmoliaeth uchel yn y categori Arweinydd Caffael y Flwyddyn, ychwanegodd Claire:
“Rwy’n falch iawn o dderbyn statws canmoliaeth uchel ar gyfer y wobr hon a hoffwn achub ar y cyfle hwn i ddiolch i bob un o fy nghydweithwyr ym Mwrdd Iechyd Caerdydd a’r Fro a PCGC sydd wedi fy nghefnogi i a fy nhîm i sicrhau blwyddyn ac ymateb llwyddiannus iawn i Covid yn GIG Cymru. Rwy'n teimlo'n ffodus fy mod yn gweithio gyda phobl anhygoel, sydd wedi fy nghefnogi i gyflawni'r strategaeth prosiectau/contractau blaengar sydd wedi arwain at ganlyniad llwyddiannus i Gymru ar sail leol, ranbarthol a chenedlaethol yn ystod y flwyddyn diwethaf. Hoffwn achub ar y cyfle hwn i ddiolch i holl staff y GIG sydd wedi gwneud cymaint yn ystod y pandemig i’n cleifion ac rwy’n cydnabod bod fy ngwobr yn ganlyniad i’w hymdrechion i gyd”.