Cynaliadwyedd a Sicrwydd Ansawdd

Bydd y cyfnod peilot yn dod i ben gyda gwerthusiad yn ymgorffori adborth gan gyfranogwyr, adborth gan y gyfadran a data arsylwadol gan y tîm cenedlaethol.

Mae adborth gan gyfranogwyr yn cael ei gasglu i ddadansoddi'r effaith a'r meysydd ar gyfer gwella'r rhaglen yn seiliedig ar fodel Kirkpatrick. Hyd yn hyn, cyflawnwyd sgôr boddhad ar gyfartaledd o 9.2 allan o 10 ar draws yr holl unedau sy'n cymryd rhan. Mae cyfranogwyr yn hunanasesu gwybodaeth a sgiliau pwnc cyn ac ar ôl y cwrs, a hyder, ac mae hyn yn dangos gwelliannau ym mhob maes pwnc yn ogystal â dealltwriaeth well o ffactorau dynol. Mae'r adborth yn tynnu sylw at ymgysylltiad cychwynnol cryf a gwerth canfyddedig gan y rhai a aeth i’r diwrnodau hyfforddi.

Fe wnaethom hefyd gynnal arolwg sylfaenol i asesu canfyddiad ac agwedd staff newyddenedigol at ddiogelwch yn eu hamgylchedd clinigol gan ddefnyddio Holiadur Agwedd Diogelwch (SAQ) dilys. Y bwriad yw ailadrodd yr SAQ tua 12 mis ar ôl ei weithredu i werthuso effeithiolrwydd y rhaglen mewn perthynas ag agweddau staff ar ddiwylliant diogelwch yn eu huned.

Mae gennym ddata canlyniadau clinigol sylfaenol a fydd yn cefnogi gwerthuso'r rhaglen. Bydd mesurau canlyniad clinigol yn cynnwys sgôr APGAR cyfnod llawn <5 ar ôl 10 munud, marwolaeth newyddenedigol cyfnod llawn a derbyniad cyfnod llawn i'r uned newyddenedigol.

Mae dogfen strategaeth yn nodi cyfres o safonau sy'n ymgorffori mesurau proses. Mae'r rhain wedi'u datblygu i gefnogi byrddau iechyd i weithredu'r rhaglen fel y bwriadwyd. Mae'r rhain yn cynnwys nifer y staff y disgwylir iddynt gymryd rhan yn MoNET Cymru yn ogystal â chynnal dull aml-broffesiynol.