Trawsnewid Mynediad at Feddyginiaethau (TrAMs)

Ar hyn o bryd, mae Gwasanaethau Technegol Fferyllol yn gweithredu fel gwasanaethau datganoledig ledled Cymru. Cânt eu rheoli ar wahân gan Fyrddau Iechyd ac Ymddiriedolaethau. Mae'r gwasanaeth yn faes arbenigol o fewn Fferylliaeth mewn Ysbytai. Mae’n cynnwys Gwasanaethau Aseptig, sy'n gyfrifol am baratoi meddyginiaethau chwistrelladwy ar ffurf sy’n barod i'w defnyddio, a hynny gan ddefnyddio technegau di-haint. Mae Gwasanaethau Aseptig yn paratoi ac yn cyflenwi meddyginiaethau cymhleth â risg uchel. Mae’r rhain yn cynnwys therapïau gwrth-ganser systemig (SACT), maethiad a gymerir trwy wythïen (mewnwythiennol) (PN) ar gyfer cleifion sy'n methu ag amsugno maetholion o'r bwyd maen nhw'n ei fwyta, a deunydd fferyllol ymbelydrol, sef meddyginiaethau ymbelydrol a ddefnyddir wrth ddiagnosio a thrin canser.

Mae Gwasanaethau Aseptig yn dechnegol ac arbenigol iawn. Mae’n hanfodol uwchraddio'r gwasanaethau hyn er mwyn cynnal cydymffurfedd â safonau rheoleiddio cynyddol llym y DU er mwyn parhau i gyflenwi meddyginiaethau i gleifion. Mae gallu’r gwasanaethau presennol i addasu ac arloesi yn gyfyngedig iawn oherwydd cyfyngiadau gofod ffisegol, diffyg adnoddau a dibyniaeth barhaus ar gyflenwyr masnachol allanol, sy'n arwain at gostau uchel.

Felly mae PCGC yn ymdrechu i fynd i'r afael â'r heriau parhaus y mae Byrddau ac Ymddiriedolaethau Iechyd yn eu hwynebu, a datblygu canolfannau gweithgynhyrchu meddyginiaethau yng ngogledd, de-ddwyrain a de-orllewin Cymru i ddarparu Gwasanaethau Technegol Fferyllol ar ran GIG Cymru. Bydd y canolfannau’n gartref i ystafelloedd glân aseptig er mwyn darparu amgylcheddau di-haint sy'n addas ar gyfer gweithgynhyrchu meddyginiaethau hanfodol. Ochr yn ochr ag adeiladu'r cyfleusterau, bydd TrAMs yn blaenoriaethu datblygu gweithlu cynaliadwy o fferyllwyr, technegwyr fferyllol a gwyddonwyr medrus iawn trwy fuddsoddi mewn rhaglenni hyfforddi cadarn a llwybrau gyrfa strwythuredig. Bydd ailgyflunio’r gwasanaethau hefyd yn cynnwys gweithredu platfform digidol, sydd eisoes yn cael ei ddefnyddio gan y Byrddau Iechyd a'r Ymddiriedolaethau, i sicrhau trosglwyddiad llyfn ac effeithlon i'r broses archebu meddyginiaethau. Ar ôl ei sefydlu, bydd TrAMs yn cael ei drwyddedu o dan drwydded Arbennig Gwneuthurwyr yr Asiantaeth Rheoleiddio Meddyginiaethau a Chynhyrchion Gofal Iechyd (MHRA). Nod hyn fydd sicrhau bod prosesau gweithgynhyrchu o'r ansawdd uchaf yn cael eu cynnal, a bod modd parhau i gyflenwi meddyginiaethau hanfodol i gleifion ledled Cymru.

Mae Achos Busnes Rhaglen ar gyfer TrAMs wedi'i gymeradwyo gan Lywodraeth Cymru, ac mae gwaith yn mynd rhagddo i nodi, caffael a datblygu cyfleusterau rhanbarthol mewn dull a gyflwynir yn raddol. Yn dilyn buddsoddiad cyfalaf o £7m a ddyfarnwyd gan Lywodraeth Cymru, Radiofferyllfa yn ne-ddwyrain Cymru yw'r cyfleuster TrAMs cyntaf i gael ei ddatblygu, a disgwylir iddo agor ddiwedd 2026. Roedd achos busnes a gyflwynwyd yn ddiweddar i Lywodraeth Cymru yn gofyn am fuddsoddiad cyfalaf o £22m i ddatblygu'r ail gyfleuster TrAMs yn ne-ddwyrain Cymru (wedi'i gydleoli â'r Radiofferyllfa) ar gyfer gweithgynhyrchu meddyginiaethau eraill a all achub bywydau, gan gynnwys SACT a PN. Amcangyfrifir y bydd Hwb y De-ddwyrain yn agor ymhen 2-3 blynedd, yn amodol ar gyllid a gaiff ei ddyfarnu gan Lywodraeth Cymru. Mae’r gwaith o nodi safleoedd priodol yng ngogledd a de-orllewin Cymru yn parhau. Er nad yw’r union amserlenni cyflawni wedi'u cadarnhau, nod rhaglen TrAMs yw agor canolfannau yn y rhanbarthau hyn rhwng 2029 a 2031.