Neidio i'r prif gynnwy

Rydym yn croesawu gohebiaeth a galwadau yn y Gymraeg.
Ni fydd ymgysylltu gyda ni yn y Gymraeg yn arwain at oedi.

Canllawiau ar Gwblhau Cais Gwasanaeth Datgelu a Gwahardd (DBS)

Rhaid i bob meddyg, deintydd ac optegydd gael gwiriad DBS Ychwanegol pan fyddant yn gwneud cais am gael eu cynnwys ar Restr Cyflawnwyr yng Nghymru. Nid oes rhaid i'r ymgeisydd dalu ar gyfer y gwasanaeth hwn.

Bydd rhaid i ymgeiswyr sydd wedi tanysgrifio i wasanaeth diweddaru’r DBS ddarparu eu tystysgrif DBS wreiddiol ddiweddaraf ynghyd â dogfennau ategol i brofi pwy ydynt (fel y manylir isod).  Bydd gofyn i chi roi’ch cydsyniad ysgrifenedig i ganiatáu i’r DBS wirio’ch statws pan fyddwch yn mynychu’r cyfarfod wyneb yn wyneb. 

Mae rhagor o wybodaeth am sut i danysgrifio i Wasanaeth Diweddaru’r DBS yn: https://www.gov.uk/dbs-update-service

Llenwi Ffurflen Gais Datgelu’r DBS (y Swyddfa Cofnodion Troseddol gynt)

Sylwch ar y pwyntiau pwysig canlynol wrth lenwi'ch ffurflen gais Datgelu DBS:

 

  • Nid yw llungopïau o'r ffurflen gais na'r ddogfennaeth ategol yn dderbyniol. Mae angen i chi ddarparu’r ffurflenni a’r dogfennau gwreiddiol.
  • O'r Rhestr o Ddogfennau Adnabod Dilys (Atodiad A) rhaid i chi ddarparu 3 dogfen i gyd; sef 1 ddogfen gan Grŵp 1 a 2 ddogfen bellach gan Grŵp 1, 2a neu 2b; rhaid i un ohonynt gadarnhau'ch cyfeiriad cyfredol. Os na allwch ddangos y dogfennau hyn, cysylltwch â Phartneriaeth Cydwasanaethau GIG Cymru i gael cyngor (rhoddir y manylion cyswllt isod).
  • Defnyddiwch inc du wrth lenwi'r ffurflen hon a rhowch un llythyren yn unig ym mhob blwch.
  • Defnyddiwch briflythrennau wrth lenwi'r ffurflen hon.
  • Mae pob rhan felyn a'u meysydd cysylltiedig yn orfodol a rhaid eu cwblhau.
  • Peidiwch â chwblhau adran D - nid oes angen hyn ar hyn o bryd.
  • Os nad yw maes yn berthnasol i chi, gadewch ef yn wag. Peidiwch â nodi ‘Amherthnasol’ nac unrhyw amrywiad ohono.
  • Os byddwch chi’n gwneud camgymeriad, rhowch linell drwyddo a'i gywiro ar y dde. Peidiwch â defnyddio hylif cywiro.
  • Sicrhewch eich bod yn nodi’r holl gyfeiriadau rydych chi wedi byw ynddynt yn ystod y pum mlynedd diwethaf gan gynnwys unrhyw gyfeiriadau tramor.  Gwrthodir eich ffurflen gan y DBS os bydd unrhyw fylchau yn yr wybodaeth a ddarperir.
  • Sicrhewch eich bod yn rhoi'r holl enwau yr ydych wedi’u defnyddio.
  • Os nad oes digon o le ar y ffurflen gais, lawrlwythwch a chwblhewch dudalen barhad drwy ymweld ag www.homeoffice.gov.uk/dbs-continuation-sheet. Os nad oes gennych fynediad i'r rhyngrwyd, gallwch ofyn am hyn gan Bartneriaeth Cydwasanaethau GIG Cymru (rhoddir y manylion cyswllt isod).
  • Os ydych wedi dewis mwy nag un o'r opsiynau “IE/NA” trwy gamgymeriad, rhowch groes yn y blwch cywir a rhowch gylch o’i chwmpas.
  • Cadwch eich llofnodion yn y blwch a ddarperir.
  • Peidiwch â chynnwys stampiau na sticeri ar y ffurflen.
  • Dylai ymgeiswyr trawsryweddol gysylltu â Llinell Drawsryweddol DBS ar 0151 676 1452 neu e-bostio sensitive@dbs.gsi.gov.uk i gael cyngor pellach ar lenwi'r ffurflen.

 

Os oes angen i chi gael unrhyw gyngor pellach ar lenwi'r ffurflen gais Datgelu DBS yna cysylltwch â swyddfa briodol Partneriaeth Cydwasanaethau GIG Cymru fel a ganlyn: -

Trwy e-bostio contact.supplist@wales.nhs.uk

 

Rhestr o Ddogfennau Adnabod Dilys

Rhaid i chi ddarparu 3 dogfen i gyd; sef 1 ddogfen o Grŵp 1 a 2 ddogfen bellach gan Grŵp 1, 2a neu 2b; rhaid i un ohonynt gadarnhau'ch cyfeiriad cyfredol. Os na allwch ddarparu’r dogfennau hyn, cysylltwch â Phartneriaeth Cydwasanaethau GIG Cymru i gael cyngor.