Cyflawniadau eithriadol yn cael eu cydnabod mewn Gwobrau Cyfreithiol diweddar

Dros y mis diwethaf mae'r tîm yng Ngwasanaethau Cyfreithiol a Risg PCGC wedi cyrraedd y rhestr fer ar gyfer nifer o wahanol wobrau lleol a chenedlaethol sy'n cydnabod rhagoriaeth yn y proffesiwn cyfreithiol.

Mae ein timau wedi cael eu cydnabod am eu rhagoriaeth wrth gefnogi'r GIG yng Nghymru, yn enwedig yn ystod y pandemig, lle mae ein timau wedi cefnogi ein cleientiaid i sicrhau bod y pethau hynny a oedd yn y newyddion yn gweithio ac yn gyfreithlon yn y byd go iawn, megis sefydlu ysbytai maes, ffyrdd newydd o ddarparu gwasanaethau iechyd a phrynu cyfarpar diogelu personol.

Ddechrau'r mis, coronwyd ein tîm cyflogaeth gwych yn Dîm Cyflogaeth y Flwyddyn.

Dywedodd Sioned Eurig, Arweinydd y Tîm Cyflogaeth, "Rwy'n falch iawn o arwain tîm mor anhygoel. Rydym i gyd wrth ein bodd i ennill gwobr yng Ngwobrau Cyfraith De Cymru a byddwn yn parhau i ymdrechu i ddarparu gwasanaeth a chyngor rhagorol i dimau Adnoddau Dynol a mwy yn GIG Cymru. Mae'r ddwy flynedd ddiwethaf wedi bod yn anodd i lawer ac rydym yn ymfalchïo ein bod wedi gallu cefnogi’r ymateb i Bandemig COVID-19. Nid yn unig rydym yn amddiffyn sefydliadau GIG Cymru mewn hawliadau Tribiwnlys Cyflogaeth ond rydym hefyd yn cynghori ar ddatblygu polisi a strwythurau i wneud y GIG yn fwy cynhwysol ac yn lle gwell i weithio."

Yng Ngwobrau Cyfreithiol Cymru yr wythnos diwethaf, dyfarnwyd y Wobr Canmoliaeth Arbennig i Wasanaethau Cyfreithiol a Risg am ein hymdrechion eithriadol ers mis Mawrth 2020 i gefnogi'r GIG yn ystod COVID-19. Roedd y beirniaid wedi eu plesio gan y ffordd y mae ein staff wedi mynd y tu hwnt i’r hyn y gellir ei ddisgwyl i gefnogi ein cleientiaid yn y GIG yn ogystal â chefnogi ein gilydd gyda mentrau lles, gan sicrhau bod yr holl staff yn cael eu cefnogi gyda llwythi gwaith uchel mewn cyfnod digynsail. Ar ôl derbyn y wobr, dangosodd y gynulleidfa gyfan o dros 200 o gyfoedion cyfreithiol eu gwerthfawrogiad o'n hymdrechion eithriadol wrth i bawb godi ar eu traed a’n cymeradwyo. 

Dywedodd Mark Harris, ein Cyfarwyddwr, "Llongyfarchiadau haeddiannol unwaith eto i'n holl staff gwych am lwyddo yng Ngwobrau'r Gyfraith De Cymru a Gwobrau Cyfreithiol Cymru.  Roedd yn arbennig o wych cael ein cydnabod yng Ngwobrau Cyfreithiol Cymru am ein hymdrechion eithriadol i gefnogi'r GIG drwy'r pandemig ac roedd yn hyfryd cael ein hanrhydeddu â phawb a oedd yn bresennol ar eu traed yn cymeradwyo."

Rhestr o'r enwebiadau ar y rhestr fer ar gyfer 2022 hyd yn hyn...

Lexis Nexis – Gwobr am Ffocws ar y Cwsmer

Gwobrau Cyfreithiol De Cymru – Tîm cyflogaeth y flwyddyn / Paragyfreithiwr y flwyddyn – Bethan Richards/ Tîm Anafiadau Personol y Flwyddyn/ Gwobr Ymateb i COVID

Gwobrau Cyfreithiol Cymru – Tîm Eiddo Tirol y flwyddyn/ Tîm Mewnol y Flwyddyn/ Gwobr Cydraddoldeb, Amrywiaeth a Chynhwysiant.