Beth yw PROMPT?

Mae PROMPT (Hyfforddiant Amlbroffesioynol Obstetrig Ymartferol) yn becyn hyfforddiant amlbroffesiynol sy'n seiliedig ar dystiolaeth ar gyfer argynfyngau obstetrig. Mae'n gysylltiedig â gwelliannau uniongyrchol mewn canlyniadau clinigol trwy wella gwybodaeth, sgiliau clinigol a ffactorau dynol. Mae wedi bod yn gysylltiedig â gostyngiad o 50% mewn babanod sydd wedi cael eu geni ar ôl cyfnod llawn yn y groth ag Apgar 5 munud <7, gostyngiad o 50% mewn enseffalopathi hypocsig-isgemig newyddenedigol (HIE) a gostyngiad o 100% mewn anafiadau plecsws breichiol parhaol ar ôl dystocia yr ysgwydd.

Mae PROMPT yn cael ei redeg gan Sefydliad Mamolaeth PROMPT, sefydliad elusennol yn Ysbyty Southmead, Bryste. Mae gan yr elusen dros 25 mlynedd o brofiad mewn hyfforddiant argyfwng obstetrig. Am ragor o wybodaeth am PROMPT, ewch i wefan Sefydliad Mamolaeth PROMPT

Mae PROMPT wedi’i gymeradwyo gan Goleg Brenhinol Obstetreg a Gynecoleg (RCOG), Cymdeithas yr Anesthetyddion Obstetrig (OAA) a Choleg Brenhinol y Bydwragedd (RCM).

Cliciwch yma i wylio fideos hyfforddiant defnyddiol ar sianel YouTube PROMPT.

I ddarllen rhagor am y cydweithredu rhwng PROMPT Cymru a PMF cliciwch ar y ddolen hon PROMPT Wales | PROMPT Maternity Foundation

I wrando ar y PROMPTCAST, cliciwch ar y ddolen hon PROMPTCast Podcast | PROMPT Maternity Foundation

Yn yr ail bennod, mae Tîm PMF yn siarad â Sophie Renwick a Sarah Hookes ynglŷn â sut y rhoddwyd hyfforddiant PROMPT Cymru ar waith. Mae PROMPTCast ar gael ar y platfformau canlynol.

Cysylltwch â ni: Prompt.Wales@wales.nhs.uk

Ffôn: 01745 366760

Twitter: @PromptWales

Cwestiynau Cyffredin

Beth mae diwrnod hyfforddi PROMPT Cymru yn ei gwmpasu?

Mae PROMPT Cymru yn gwrs hyfforddi undydd, a fynychir ac a hwylusir gan dîm mamolaeth amlbroffesiynol. Mae'r pwyslais ar waith tîm, cyfathrebu ac effaith ffactorau dynol, yn ogystal â rheolaeth glinigol. Mae cynrychiolwyr yn cael eu dyrannu i dimau amlbroffesiynol i gymryd rhan mewn argyfyngau obstetreg efelychiedig yn eu lleoliad clinigol eu hunain. Byddai rhai enghreifftiau yn cynnwys mynd i enedigaethau o chwith heb ddiagnosis mewn uned dan arweiniad bydwraig neu reoli ataliad y galon. Mae timau bydwreigiaeth cymunedol yn mynd i hyfforddiant PROMPT Cymru Cymunedol lle maent yn hyfforddi ochr yn ochr â pharafeddygon ac yn ymarfer rheoli argyfyngau genedigaeth mewn lleoliad cymunedol.

Beth yw amcan cyffredinol rhaglen PROMPT Cymru?

Mae PROMPT Cymru yn 'fwy na hyfforddiant yn unig,' mae'n ymwneud â'r hyn sy'n digwydd bob dydd mewn ymarfer clinigol. Mae hyfforddiant yn dod â'r tîm at ei gilydd, ac yn helpu i feithrin perthnasoedd gwaith parchus lle mae pob aelod o'r tîm yn teimlo'n werthfawr ac yn ddiogel i leisio barn. Mae hyfforddiant PROMPT Cymru wedi annog ymgorffori algorithmau a ffurflenni mewn ymarfer bob dydd yn GIG Cymru, gan wneud 'y ffordd gywir y ffordd hawsaf'. Ac, wrth gwrs, amcan cyffredinol hyfforddiant PROMPT Cymru yw gwella rheolaeth glinigol argyfwng obstetrig trwy welliannau mewn gwaith tîm, cyfathrebu a defnyddio offer ac algorithmau, sy’n arwain at ofal a chanlyniadau mamolaeth mwy diogel.

Sut y byddwn yn gwybod bod hyfforddiant PROMPT Cymru yn effeithiol?

Fel y dangoswyd yn Ysbyty Southmead ym Mryste ac unedau mamolaeth eraill yn y DU a thramor, rydym yn disgwyl gweld gwelliannau mewn canlyniadau yma yng Nghymru.

Rydym wedi dangos gwelliannau yng nghanfyddiad staff o waith tîm a diogelwch, wedi'i fesur gan ddefnyddio Holiadur Agwedd Diogelwch dilys. Mae canlyniadau o weithredu PROMPT Cymru cyn ac ar ôl hynny yn dangos gwelliant ym mhob un o'r chwe maes: gwaith tîm, hinsawdd diogelwch, canfyddiad o reolaeth, boddhad swydd, amodau gwaith a chydnabod straen.

Mae PROMPT Cymru hefyd wedi bod yn effeithiol wrth ddod â thimau ynghyd i hyfforddi a lleihau amrywiad yn y ddarpariaeth ac ansawdd hyfforddiant. Yn 2017, ychydig iawn o hyfforddiant amlbroffesiynol oedd ar gael yng ngwasanaethau mamolaeth GIG Cymru, gyda'r gwahanol broffesiynau'n derbyn hyfforddiant amrywiol. Roedd hyn yn amrywio rhwng yr unedau obstetreg yng Nghymru. Mae ein mesurau proses yn dangos bod hyfforddiant PROMPT Cymru wedi'i safoni ledled Cymru; wedi'i hwyluso gan fydwragedd, obstetryddion ac anesthetyddion; ac mae’r tîm amlbroffesiynol cyfan yn mynd iddo. Roedd presenoldeb cyffredinol ar gyfer 2022-23 yn 90% o holl staff mamolaeth GIG Cymru.

Mae PROMPT yn gysylltiedig â gostyngiad mewn sgoriau Apgar 5 munud isel a HIE (Draycott et al, 2005). Mae GIG Cymru wedi gweld gostyngiad yn sgôr APGAR cyfnod llawn a chynamserol o lai na 7 ar ôl 5 munud ers gweithredu PROMPT Cymru.

Dolenni ac Adnoddau

Cysylltwch

Os oes gennych ymholiad ar gyfer PROMPT Cymru, cysylltwch isod.