Cymorth Gweithredu

The PROMPT Wales Implementation Team with members of the PROMPT Maternity Foundation

Ym mis Mai a mis Mehefin 2018, daeth timau aml-broffesiynol o anesthetyddion, bydwragedd, obstetryddion, gweithwyr cymorth a darlithwyr prifysgol o bob cwr o Gymru ynghyd i hyfforddi fel hwyluswyr PROMPT mewn cwrs hyfforddi pwrpasol i staff a ddarparwyd gan Sefydliad Mamolaeth PROMPT.

Gyda chefnogaeth Tîm Gweithredu PROMPT Cymru, cymerodd y clinigwyr profiadol hyn gyfrifoldeb am ddatblygu'r cynnwys a chyflwyno cyrsiau PROMPT Cymru yn eu gwasanaethau eu hunain ac erbyn mis Ionawr 2019, roedd PROMPT Cymru yn cael ei redeg ym mhob un o'r 7 Bwrdd Iechyd. Cefnogodd y Tîm Gweithredu, sy'n cynnwys tîm aml-broffesiynol o glinigwyr o GIG Cymru a Sefydliad Mamolaeth PROMPT, dimau cyfadran lleol i drefnu, gweithredu a chyflwyno hyfforddiant PROMPT Cymru.

Addaswyd deunyddiau hyfforddi PROMPT i gyd-fynd â mentrau GIG Cymru a daeth y brand PROMPT Cymru i fodolaeth! Ariannodd Cronfa Risg Cymru adnoddau hyfforddi hanfodol gan gynnwys modelau ymarfer a Llawlyfrau PROMPT i hwyluso cyflwyno PROMPT Cymru.

Cynhaliwyd diwrnodau hyfforddi Datblygu Cyfadran cenedlaethol a mewnol ychwanegol gan y tîm gweithredu drwy gydol 2019, er mwyn sicrhau bod nifer ddigonol o glinigwyr aml-broffesiynol yn cael eu hyfforddi fel staff academaidd.

Cynhaliwyd Lansiad Cenedlaethol PROMPT Cymru ar 23 Hydref 2018 yng Nghaerdydd gyda phrif anerchiadau gan Reolwr Gyfarwyddwr Partneriaeth Gwasanaethau a Rennir GIG Cymru, y Prif Swyddog Nyrsio a Phrif Swyddog Meddygol Cymru.

Yn 2019, gwnaeth Llywodraeth Cymru orfodi bydwragedd, meddygon obstetreg ac anesthetyddion sy'n darparu gofal mamolaeth yn rheolaidd i gymryd rhan yn hyfforddiant PROMPT Cymru (dolen i Gylchlythyr Iechyd Cymru) Gweithredu safonau PROMPT mewn gwasanaethau mamolaeth yng Nghymru (WHC/2019/022) | LLYW.CYMRU

Yn y flwyddyn gyntaf, cynhaliwyd 107 o gyrsiau PROMPT Cymru yn GIG Cymru!

Mae rhagor o wybodaeth am weithredu PROMPT Cymru ar gael yn yr erthygl hon a gyhoeddwyd yn y BMJ.

Cwestiynau Cyffredin

Beth mae diwrnod hyfforddi PROMPT Cymru yn ei gwmpasu?

Mae PROMPT Cymru yn gwrs hyfforddi diwrnod cyfan gyda thîm mamolaeth amlbroffesiynol yn bresennol ac yn ei hwyluso. Mae'r pwyslais ar weithio mewn tîm a chyfathrebu, felly mae cynrychiolwyr yn cael eu dyrannu i dimau aml-broffesiynol i gymryd rhan mewn argyfyngau obstetreg a efelychir yn y meysydd clinigol. Rhai enghreifftiau fyddai rheoli genedigaeth o chwith (breech) nad oedd wedi’i ganfod mewn uned dan arweiniad bydwraig neu ddelio â menyw feichiog sy’n cael trawiad ar y galon. Mae timau bydwreigiaeth gymunedol hefyd yn mynychu hyfforddiant PROMPT Cymru yn y Gymuned lle maent yn hyfforddi ochr yn ochr â pharafeddygon ac yn ymarfer rheoli argyfyngau mewn lleoliad cymunedol.

Beth yw amcan cyffredinol rhaglen PROMPT Cymru?

Mae hyfforddiant PROMPT Cymru yn canolbwyntio ar reoli sefyllfaoedd brys a allai godi yn effeithiol yn ystod beichiogrwydd a genedigaeth. Mae'n pwysleisio pwysigrwydd gwaith tîm a chyfathrebu effeithiol, ac yn rhoi cyfle i dimau ymarfer delio ag argyfyngau prin mewn amgylchedd sydd wedi’i efelychu. Fel y dangoswyd yn Ysbyty Southmead ym Mryste ac unedau mamolaeth eraill yn y DU a thramor, rydym yn disgwyl gweld gwelliannau trwy ganlyniadau mwy diogel i famau a babanod yng Nghymru.

Sut y byddwn yn gwybod bod hyfforddiant PROMPT Cymru yn effeithiol?

Ar ôl casglu data ôl-weithredol o unedau mamolaeth ledled Cymru, bydd PROMPT Cymru yn gwneud cymariaethau ar ôl cyfnodau cytunedig i weld a yw’r canlyniadau clinigol yn gwella. Mae gennym ddiddordeb hefyd yng nghanfyddiad y staff ynghylch gweithio mewn tîm a diogelwch, ac rydym wedi mesur hyn gan ddefnyddio Holiadur am Agweddau ar Ddiogelwch. Dangosodd canlyniadau cyn ac ar ôl gweithredu gwelliant ym mhob un o'r chwe maes: Gwaith Tîm, Diogelwch, yr Hinsawdd, Canfyddiad o reolwyr, Boddhad swydd, Amodau gwaith a chydnabod straen. Rydym hefyd yn awyddus i ddeall canfyddiadau menywod o'r gofal a dderbynnir yn ystod argyfyngau o ran diogelwch a chyfathrebu, ac rydym yn bwriadu casglu gwybodaeth a fydd yn helpu i lywio ein hyfforddiant.

Cysylltwch

Os oes gennych ymholiad ar gyfer PROMPT Cymru, cysylltwch isod.