Cymorth Gweithredu

The PROMPT Wales Implementation Team with members of the PROMPT Maternity Foundation

Mae Cronfa Risg Cymru wedi sefydlu Tîm Cenedlaethol PROMPT Cymru, sy’n cynnwys clinigwyr profiadol o bob cwr o GIG Cymru a chymorth ychwanegol gan PROMPT Maternity Foundation. Trwy gefnogi cyfadrannau PROMPT Cymru lleol i hyfforddi aelodau ychwanegol o’u cyfadran, bydd Tîm Cenedlaethol PROMPT Cymru yn sicrhau bod digon o glinigwyr medrus i arwain hyfforddiant PROMPT Cymru. Yn ystod y cyfnod gweithredu, bydd Tîm Cenedlaethol PROMPT Cymru yn darparu cymorth â ffocws i’r holl wasanaethau mamolaeth ledled GIG Cymru, gan adeiladu ar y sylfeini hyfforddiant cryf a chynorthwyo pob gwasanaeth mamolaeth i ddatblygu rhaglen gynaliadwy, fel bod modd sicrhau hyfforddiant o ansawdd uchel flwyddyn ar ôl blwyddyn ledled Cymru.

Cwestiynau Cyffredin

Beth mae diwrnod hyfforddi PROMPT Cymru yn ei gwmpasu?

Mae PROMPT Cymru yn gwrs hyfforddi diwrnod cyfan gyda thîm mamolaeth amlbroffesiynol yn bresennol ac yn ei hwyluso. Mae'r pwyslais ar weithio mewn tîm a chyfathrebu, felly mae cynrychiolwyr yn cael eu dyrannu i dimau aml-broffesiynol i gymryd rhan mewn argyfyngau obstetreg a efelychir yn y meysydd clinigol. Rhai enghreifftiau fyddai rheoli genedigaeth o chwith (breech) nad oedd wedi’i ganfod mewn uned dan arweiniad bydwraig neu ddelio â menyw feichiog sy’n cael trawiad ar y galon. Mae timau bydwreigiaeth gymunedol hefyd yn mynychu hyfforddiant PROMPT Cymru yn y Gymuned lle maent yn hyfforddi ochr yn ochr â pharafeddygon ac yn ymarfer rheoli argyfyngau mewn lleoliad cymunedol.

Beth yw amcan cyffredinol rhaglen PROMPT Cymru?

Mae hyfforddiant PROMPT Cymru yn canolbwyntio ar reoli sefyllfaoedd brys a allai godi yn effeithiol yn ystod beichiogrwydd a genedigaeth. Mae'n pwysleisio pwysigrwydd gwaith tîm a chyfathrebu effeithiol, ac yn rhoi cyfle i dimau ymarfer delio ag argyfyngau prin mewn amgylchedd sydd wedi’i efelychu. Fel y dangoswyd yn Ysbyty Southmead ym Mryste ac unedau mamolaeth eraill yn y DU a thramor, rydym yn disgwyl gweld gwelliannau trwy ganlyniadau mwy diogel i famau a babanod yng Nghymru.

Sut y byddwn yn gwybod bod hyfforddiant PROMPT Cymru yn effeithiol?

Ar ôl casglu data ôl-weithredol o unedau mamolaeth ledled Cymru, bydd PROMPT Cymru yn gwneud cymariaethau ar ôl cyfnodau cytunedig i weld a yw’r canlyniadau clinigol yn gwella. Mae gennym ddiddordeb hefyd yng nghanfyddiad y staff ynghylch gweithio mewn tîm a diogelwch, ac rydym wedi mesur hyn gan ddefnyddio Holiadur am Agweddau ar Ddiogelwch. Dangosodd canlyniadau cyn ac ar ôl gweithredu gwelliant ym mhob un o'r chwe maes: Gwaith Tîm, Diogelwch, yr Hinsawdd, Canfyddiad o reolwyr, Boddhad swydd, Amodau gwaith a chydnabod straen. Rydym hefyd yn awyddus i ddeall canfyddiadau menywod o'r gofal a dderbynnir yn ystod argyfyngau o ran diogelwch a chyfathrebu, ac rydym yn bwriadu casglu gwybodaeth a fydd yn helpu i lywio ein hyfforddiant.

Cysylltwch

Os oes gennych ymholiad ar gyfer PROMPT Cymru, cysylltwch isod.