Rheolwr Practis Meddyg Teulu yn euog o dwyll gwerth £324,000

Yn dilyn ymchwiliad gan Wasanaeth Atal Twyll Cymru y GIG, dedfrydwyd Clare Boland, cyn-reolwr practis Meddyg Teulu i 3 blynedd mewn carchar yn Llys y Goron Abertawe.

Mewn gwrandawiad cynharach, roedd Boland wedi cyfaddef iddi gymryd £324,000 gan ei chyflogwr a phlediodd yn euog i un drosedd o Dwyll drwy Gamddefnyddio Swydd.

Roedd Boland yn gweithio ym Meddygfa Fairfield ym Mhort Talbot er 2009. Roedd ganddi gyfrifoldeb llwyr am weithrediadau ariannol dyddiol y practis gan gynnwys y gyflogres a thalu meddygon locwm a chyflenwyr.

Ar adeg ei hataliad yn 2022 roedd ei chyflog oddeutu £45,000 y flwyddyn. Daeth y twyll i’r amlwg pan ddarganfuwyd rhai dogfennau ariannol yn y feddygfa a oedd yn dangos bod taliad diweddar wedi'i wneud i feddyg locwm nad oedd wedi gweithio yn y feddygfa ers nifer o flynyddoedd.

Cyfeiriodd un o uwch bartneriaid y practis y mater at Heddlu De Cymru fis Mawrth 2022 a throsglwyddwyd y mater i Wasanaeth Atal Twyll Cymru y GIG i'w ymchwilio. Fel rhan o'r ymchwiliad, cynhaliodd Ymchwilydd Ariannol Gwasanaeth Atal Twyll Cymru y GIG ddadansoddiad o gyfrif banc Boland a phenderfynu bod yr arian a gafodd ei ddwyn wedi'i drosglwyddo i'w chyfrif banc a'i wario.

Dywedodd y Barnwr Catherine Richards wrth ei dedfrydu:

“Mae effaith y math hwn o dwyll yn amrywiol – yn emosiynol, yn ymarferol ac yn ariannol.”

Meddai Cheryl Hill, Dirprwy Reolwr Gweithredol Twyll yng Ngwasanaeth Atal Twyll GIG Cymru:

“Mae effaith gweithredoedd twyllodrus Boland yn bellgyrhaeddol ac wedi cael effaith sylweddol ar ei chyn-gyflogwr. Camddefnyddiodd Boland ei statws ac ymddiriedaeth ei chyflogwyr a'i chydweithwyr ar gyfer ei chwant personol ei hun.

“Bydd Gwasanaeth Atal Twyll Cymru y GIG nawr yn defnyddio ei bwerau o dan Ddeddf Enillion Troseddau 2002 i adennill yr arian a ladratodd Boland a’i ddychwelyd i’r dioddefwyr.”